iPhone құрылғысында AssistiveTouch мүмкіндігін пайдалану
iPhone құрылғысындағы AssistiveTouch функциясының көмегімен сенсорлы экранды қажеттіліктеріңізге бейімдеуіңізге болады. Кей қимылдар сізге жарамаса, оларды түру қимылымен немесе басқа қимылмен алмастырыңыз, я болмаса қарапайым дыбыс қолданыңыз. Сондай-ақ AssistiveTouch функциясын iPhone түймелерін басу қажет болған кезде пайдалануға болады. AssistiveTouch функциясын ешқандай керек-жарақсыз немесе үйлесімді бейімделетін керек-жарақсыз (джойстик сияқты) қолдануға болады.
Төмендегідей әрекеттерді орындау үшін AssistiveTouch функциясын да пайдалануыңызға болады:
Басты экранға өту
Екі рет түрту
Бірнеше саусақ қимылдарын орындау
Жылжу қимылдарын орындау
Siri көмекшісін белсендіру
Басқару орталығына, хабарландыруларға, Құлыптау экранына немесе «Қолданбалар ауыстырғышы» қолданбасына қол жеткізу
iPhone құрылғысында дыбыс деңгейін реттеу
iPhone құрылғысын шайқау
Скриншот түсіру
3D Touch құралын пайдалану (қолдау көрсетілген iPhone үлгілері)
Apple Pay сервисін пайдалану
«Төтенше қоңырау — SOS» функциясын пайдалану
Экранды айту
Кідірту реттеулерін реттеу
iPhone құрылғысын қайта іске қосу
AssistiveTouch функциясын баптау
Siri: Мына сөздер сияқты бірнәрсені айтыңыз: «Turn on AssistiveTouch» немесе «Turn off AssistiveTouch». Siri көмекшісін пайдалану жолын үйреніңіз.
Немесе келесі әрекеттерді орындаңыз:
«Реттеулер» > «Әмбебап қол жеткізу» > «Түрту» > «AssistiveTouch» реттеуіне өтіңіз.
AssistiveTouch функциясын қосыңыз. Экранда AssistiveTouch мәзірінің түймесі пайда болады.
AssistiveTouch мүмкіндігін теңшеу үшін келесілердің кез келгенін түртіңіз:
Жоғарғы деңгей мәзірін бейімдеу: Белгішенің әрекетін өзгерту үшін оны түртіңіз. Мәзірдегі белгішелер санын өзгерту үшін немесе түймесін түртіңіз. Мәзірде сегіз белгішеге дейін болуы мүмкін.
«Бір рет түрту», «Екі рет түрту», «Ұзақ басып тұру» немесе 3D Touch: Мәзір түймесімен әрекеттескен кезде іске қосылатын теңшелетін әрекеттерді тағайындаңыз. 3D Touch тек қолдау көрсетілген iPhone үлгілерінде қолжетімді болады.
Жаңа қимыл жасау: Таңдаулы қимылдарыңызды қосыңыз.
Күту күйіндегі түссіздік: Пайдаланылмаған кезде мәзір түймесінің көрінуін реттеңіз.
AssistiveTouch көмегімен растау: Face ID функциясы бар iPhone құрылғысында төлемдерді бүйірлік түймені екі рет басудың орнына AssistiveTouch функциясын пайдалану арқылы Face ID көмегімен растаңыз.
Кеңес: AssistiveTouch функциясын жылдам қосу немесе өшіру үшін Әмбебап қол жеткізу пәрменін баптауыңызға, одан кейін бүйірлік түймені немесе «Басты бет» түймесін үш рет басуыңызға болады.
AssistiveTouch функциясын пайдалану
AssistiveTouch қосулы тұрған кезде, AssistiveTouch мәзірі түймесін түртіңіз, одан кейін бір әрекетті немесе қимылды таңдаңыз.
Алдыңғы мәзірге оралу үшін мәзірдің ортасындағы көрсеткіні түртіңіз. Қимылды орындамастан мәзірден шығу үшін мәзірдің сыртында кез келген жерді түртіңіз.
AssistiveTouch мәзір түймесін жылжыту үшін оны экрандағы жаңа орынға сүйреңіз.
Көп саусақ қимылы үшін келесі әрекетті орындаңыз:
Түйістіру және бұру: «Арнаулы» түймесін, одан кейін «Түйістіру және бұру» түймесін түртіңіз. Екі түйістіру шеңберлері пайда болғанда, түйістіру шеңберлерін жылжыту үшін экранда кез келген жерді түртіңіз, одан кейін түйістіру немесе бұру қимылын орындау үшін оларды ішке немесе сыртқа сүйреңіз. Аяқтаған кезде, мәзір түймесін түртіңіз.
Көп саусақпен сырғыту немесе сүйреу: «Құрылғы» > «Толығырақ» > «Қимылдар» тармағын түртіңіз, одан кейін қимыл үшін қажетті сандар санын түртіңіз. Экранда шеңберлер пайда болғанда, қимылға қажетті бағытта сырғытыңыз немесе сүйреңіз. Аяқтаған кезде, мәзір түймесін түртіңіз.
iPhone құрылғысын көрсеткіш құрылғымен басқару
Трекпадтар, ойын контроллерлері мен тінтуір құрылғылары сияқты Bluetooth® және USB көмекші көрсеткіш құрылғыларын жалғауыңызға болады.
«Реттеулер» > «Әмбебап қол жеткізу» > «Түрту» > «AssistiveTouch» реттеуіне өтіңіз.
AssistiveTouch функциясын қосыңыз.
«Көрсеткіш құрылғылар» бөлімінің астында келесі параметрлердің кез келгенін түртіңіз:
Құрылғылар: Құрылғыларды жұптаңыз немесе жұбын ажыратыңыз және түймелерді теңшеңіз.
Тінтуір пернелері: AssistiveTouch меңзерін пернетақтамен басқарылуына рұқсат етіңіз.
Көрсеткіш стилі: Өлшемді, түсті және автоматты түрде жасыру реттеулерін реттеңіз.
Экрандық пернетақтаны көрсету: Экрандағы пернетақтаны көрсетіңіз.
Басу кезіндегі дыбыс: көрсеткіш құрылғы басылғанда дыбыс ойнатылады.
Мәзірді әрдайым көрсету: Меңзер құрылғысы қосылған кезде AssistiveTouch мәзірін көрсетіңіз.
Жылжу сезімталдығы: тінтуірді жылжытқан кезде немесе трекпадта саусағыңызды жүргізген кезде меңзер қаншалықты жылдам қозғалатынын реттеңіз.
Сондай-ақ меңзердің сыртқы көрінісін де өзгертуге болады.
«Авто басу арқылы басқару» функциясын баптау
iPhone таңдалған әрекетті курсорды экран элементінде немесе экран аймағында тұрақты ұстап тұрған кезіңізде орындайды.
«Реттеулер» > «Әмбебап қол жеткізу» > «Түрту» > «AssistiveTouch» тармағына өтіңіз, одан кейін «Авто басу арқылы басқару» реттеуін қосыңыз.
Келесі параметрлердің кез келгенін реттеңіз:
Қайтару кезіндегі әрекет: Операцияны орындағаннан кейін кідірту әрекетін таңдалған резервтік әрекетке қайтару үшін қосыңыз.
Шекті қозғалыс: Элементте тоқтап тұрған кезде курсор қозғала алатын қашықтықты реттеңіз.
Белсенді бұрыштар: Скриншот түсіру, Басқару орталығын ашу, Siri көмекшісін белсендіру немесе жылдам пәрменді пайдалану сияқты таңдалған әрекетті курсор экранның бұрышында кідіргенде орындаңыз.
Кідірту әрекетін бастауға қажет уақыт: немесе түймесін түртіңіз.
Қимылдарды орындау үшін қарапайым дыбыстарды пайдалану
AssistiveTouch функциясының көмегімен iPhone құрылғысына таңдай қағу немесе ысылдаған дыбыс сияқты қарапайым дыбыс шығарғанда бір қимыл немесе басқа әрекет орындатуға болады.
«Реттеулер» > «Әмбебап қол жеткізу» > «Түрту» > «AssistiveTouch» тармағына өтіңіз, одан кейін «AssistiveTouch» параметрін қосыңыз.
«Дыбыс әрекеттері» опциясын, содан кейін бір дыбысты түртіңіз.
Сіз дыбыс шығарғанда орындалатын қимылды немесе басқа әрекетті таңдаңыз.
Қимылды немесе әрекетті орындау үшін жай ғана дыбыс шығарыңыз.
Теңшелетін қимылдар жасау
AssistiveTouch мәзіріне жиі пайдаланатын қимылдарыңызды (басып тұру немесе екі саусақпен бұру сияқты) қосуыңызға болады. Керек десеңіз бірнеше қимылдарды жасауыңызға болады, мысалы, бұрудың түрлі градустарымен.
«Реттеулер» > «Әмбебап қол жеткізу» > «Түрту» > «AssistiveTouch» > «Жаңа қимылды жасау» тармағына өтіңіз.
Қимылыңызды жазу экранында орындаңыз. Мысалы:
Басып тұру қимылы: Жазу барысы жолағы жартысына жеткенше саусағыңызды бір нүктеде басып тұрыңыз, одан кейін саусағыңызды көтеріңіз. Жазу кезінде саусағыңызды жылжытпаңыз, болмаса қимыл сүйреу ретінде жазылады.
Екі саусақпен бұру қимылы: iPhone экранында екі саусақты олардың арасындағы нүкте айналасында айналдырыңыз. (Мұны бір саусақпен немесе қаламмен орындай аласыз—жай ғана әрбір доғаны бірінен кейін бірін бөлек жасаңыз.)
Түртулердің немесе сүйреу қимылдарының тізбегін жазсаңыз, олардың барлығы бір уақытта ойнатылады. Мысалы, төрт бөлек, тізбекті түртулерді экрандағы төрт орында жазу үшін бір саусақты немесе қаламды пайдалану қатар төрт саусақты түртуді жасайды.
Қимылыңыз дұрыс болып шықпаса, «Бас тарту» түймесін түртіңіз, одан кейін әрекетті қайталаңыз.
Қимылыңызға көңіліңіз толған кезде «Сақтау» түймесін түртіңіз, одан кейін қимылға атау беріңіз.
Өз арнаулы қимылыңызды пайдалану үшін AssistiveTouch мәзірі түймесін түртіңіз, «Арнаулы» түймесін түртіңіз, одан кейін қимылды таңдаңыз. Қимылыңызды көрсететін көк шеңберлер пайда болған кезде оларды қимылды пайдаланғыңыз келетін жерге сүйреңіз, одан кейін босатыңыз.