ഘട്ടം 1: സ്ക്രീൻ സമയത്തെക്കുറിച്ച് നിങ്ങളുടെ കുട്ടിയുമായി ഒരു സംഭാഷണം നടത്തൂ

പ്രായം കുറഞ്ഞ കുട്ടികളുടെ കാര്യത്തിൽ, അവരുമായി ചേർന്ന് കാണുകയും കളിക്കുകയുമാണ് വേണ്ടത്, അതിലൂടെ അവരുടെ കാഴ്ചപ്പാട് മനസ്സിലാക്കാനും ലളിതവും പങ്കിട്ടതുമായ യോജിപ്പുകളിൽ എത്തിച്ചേരാനും കഴിയും. ഇവയിൽ ഭക്ഷണ സമയങ്ങളും ഉറങ്ങുന്നതിന് മുൻപുള്ള മണിക്കൂറും പോലുള്ള സ്ക്രീൻ-രഹിത സമയങ്ങളും, കിടപ്പുമുറികൾ പോലുള്ള സ്ക്രീൻ-രഹിത മേഖലകളും ഉൾപ്പെട്ടേക്കാം. നിങ്ങൾ നിശ്ചയിക്കുന്ന പരിധികൾക്ക് പിന്നിലെ കാരണങ്ങൾ വിശദീകരിക്കൂ. വളർന്നുകൊണ്ടിരിക്കുന്ന ശരീരത്തിനും മനസ്സിനും ഉറക്കവും ചലനവും ഓഫ്‌ലൈൻ കളികളും പ്രധാനമാണ്. നിങ്ങൾ ചർച്ച ചെയ്യുന്ന അതിരുകൾക്ക് പിന്തുണ നൽകാൻ അവരുടെ Apple ഡിവൈസിലെ ‘സ്ക്രീൻ സമയ’ ക്രമീകരണങ്ങൾ നിങ്ങൾക്ക് ക്രമീകരിക്കാം.

നിങ്ങളുടെ കുട്ടിക്ക് പ്രായം കൂടുന്നതനുസരിച്ച്, ‘സ്ക്രീൻ സമയം’ മാനേജ് ചെയ്യുന്നതിൽ നിന്ന് മാറി സ്ക്രീൻ സമയം സ്വയം ക്രമീകരിക്കാൻ അവരെ സഹായിക്കാൻ നിങ്ങൾ ആഗ്രഹിച്ചേക്കാം—അങ്ങനെയാകുമ്പോൾ, പ്രായപൂർത്തിയാകുമ്പോഴേക്കും ആരോഗ്യകരമായ ശീലങ്ങൾ അവരിൽ ഉറച്ചിട്ടുണ്ടാകും. സംഭാഷണത്തെ അവർ ഡിവൈസിൽ എത്ര സമയമാണ് ചെലവഴിക്കുന്നത് എന്നതിൽ നിന്ന് അവർ യഥാർഥത്തിൽ എന്താണ് ചെയ്യുന്നത് എന്നതിലേക്ക് നീങ്ങാൻ അനുവദിക്കൂ. കുറ്റപ്പെടുത്തുന്നതിന് പകരം കാര്യങ്ങൾ അറിയാനുള്ള കൗതുകം കാണിക്കൂ.

AAP അതിന്റെ വെബ്സൈറ്റിൽ നിങ്ങൾക്ക് ഉപയോഗിക്കാനാകുന്ന സംഭാഷണം ആരംഭിക്കാനുള്ള മാതൃകകൾ നൽകുന്നു, ഉദാഹരണത്തിന്:

• ‘സാങ്കേതികവിദ്യ ഉപയോഗിക്കുന്നതിന് നമ്മുടെ കുടുംബം എങ്ങനെ പരിധികൾ സജ്ജമാക്കണം എന്നതിനെക്കുറിച്ച് നമുക്ക് സംസാരിച്ചാലോ? നമുക്കിത് ഒരുമിച്ച് ചെയ്യാം, കാരണം ഈ തീരുമാനങ്ങളിൽ നിന്നെക്കൂടി ഉൾപ്പെടുത്താൻ ഞാൻ ആഗ്രഹിക്കുന്നു.’

• ‘ദിവസത്തിൽ ഏതെങ്കിലും സമയത്ത് നമ്മൾ ഫോണോ മറ്റ് ഡിവൈസുകളോ ഉപയോഗിക്കാൻ പാടില്ല എന്ന് നിനക്ക് തോന്നുന്നുണ്ടോ? ഉദാഹരണമായി, നമ്മൾ ഒരുമിച്ച് ഡിന്നർ കഴിക്കുമ്പോളോ മറ്റോ.’

• ‘ഞാൻ ഫോൺ ഉപയോഗിക്കാതെ നിന്റെ കൂടെ മാത്രം സമയം ചിലവഴിക്കണമെന്ന് നിനക്ക് ആഗ്രഹമുള്ള ഏതെങ്കിലും സമയങ്ങളുണ്ടോ?’

സ്ക്രീൻ സമയത്തെക്കുറിച്ച് നിങ്ങളുടെ കുട്ടിയുമായി നിങ്ങൾ സംസാരിക്കുമ്പോൾ, സാങ്കേതികവിദ്യ സുരക്ഷിതമായും ശ്രദ്ധയോടെയും എങ്ങനെ ഉപയോഗിക്കണമെന്ന അറിവ് നൽകുന്ന ഡിജിറ്റൽ സാക്ഷരത വളർത്താൻ നിങ്ങൾക്ക് അവരെ സഹായിക്കാം. നിങ്ങൾക്ക് നിങ്ങളുടെ കുട്ടിയെ എന്ത് പങ്കിടണം, ആരെ വിശ്വസിക്കണം, കൂടാതെ ഓൺലൈനിൽ ആളുകളോട് എങ്ങനെ പെരുമാറണം എന്നിവ മനസ്സിലാക്കാൻ സഹായിക്കാം. നിങ്ങളുടെ ശ്രദ്ധയിൽപ്പെടുന്ന തെറ്റായ വിവരങ്ങളുടെ ഉദാഹരണങ്ങൾ നിങ്ങൾക്ക് ചൂണ്ടിക്കാണിക്കാം, ഇൻഫ്ലുവൻസർമാരും പരസ്യങ്ങളും എന്താണ് വിൽക്കാൻ ശ്രമിക്കുന്നതെന്ന് ചോദ്യം ചെയ്യാം, കൂടാതെ ഉപയോഗിക്കാൻ തുടങ്ങിയാൽ നിർത്താൻ ബുദ്ധിമുട്ടുള്ള ആപ്പുകളെക്കുറിച്ച് സംസാരിക്കുകയും ചെയ്യാം. സംസാരം ഒരുവഴിക്കു മാത്രമല്ലാതെ പരസ്പരമുള്ളതാകുമ്പോൾ, സൈബർ ബുള്ളിയിങ്, സ്വകാര്യത തുടങ്ങിയ വിഷമകരമായ കാര്യങ്ങളും പറയാൻ അവസരമുണ്ടാകും. അതുവഴി എന്തു കാര്യവും നിങ്ങളോട് പറയാമെന്ന ധൈര്യം കുട്ടിക്ക് ഉണ്ടാകും.