Деректеріңізді жаңа Mac Studio компьютеріңізге тасымалдау
Файлдар мен параметрлерді басқа Mac компьютерінен немесе компьютерден Mac Studio компьютеріне сымсыз көшіру оңай. Ақпаратты Mac Studio компьютеріңізге бұрыннан бар компьютерден немесе USB сақтау құрылғысындағы Time Machine сақтық көшірмесінен тасымалдауыңызға болады.
Ескі компьютеріңіздегі macOS нұсқасын ондағы ақпаратты тасымалдамастан бұрын жаңартуыңыз керек болуы мүмкін—Migration Assistant көмекшісі macOS 10.7 немесе одан кейінгі жүйені талап етуі мүмкін, бірақ ескі компьютеріңізді мүмкіндігінше ең соңғы нұсқаға жаңартқан дұрыс болады. Сізде қандай үлгі бар екенін білмесеңіз немесе басқа үлгілер туралы ақпарат тапқыңыз келсе, Mac mini компьютеріңіздің үлгісін анықтау, iMac компьютеріңіздің үлгісін анықтау немесе Mac Pro компьютеріңіздің үлгісін анықтау атты Apple Support мақалаларын қараңыз.
Кеңес: Жақсы нәтижелерге қол жеткізу үшін жаңа Mac Studio компьютеріңізде macOS жүйесінің ең соңғы нұсқасы іске қосылып тұрғанын тексеріңіз. System Settings терезесін ашыңыз, одан кейін жаңартуларды тексеру үшін General > Software Update түймесін басыңыз.
Компьютерден Mac компьютеріне көшіңіз. Mac компьютерін бірінші рет пайдалансаңыз және Windows компьютерінен ауысқыңыз келсе, macOS жүйесінің пайдаланушы нұсқаулығындағы Ақпаратты компьютерден Mac компьютеріне тасымалдау бөлімін және Деректерді Windows компьютерінен Mac компьютеріңізге көшіру атты Apple Support мақаласын қараңыз.
Сымсыз тасымалдаңыз. Mac Studio компьютеріңізді бірінші рет орнатқан кезде деректеріңізді тасымалдамаған болсаңыз, Migration Assistant мүмкіндігін кез келген уақытта пайдалануыңызға болады. Finder терезесін ашыңыз, Applications тармағына өтіңіз, Utilities қалтасын ашыңыз, одан кейін Migration Assistant түймесін екі рет басыңыз және экрандағы нұсқауларды орындаңыз. Екі компьютердің де бір желіге қосылғанын тексеріңіз және көшіру процесі бойы компьютерлерді бір-біріне жақын ұстаңыз.
Кеңес: Wi-Fi желіңіз жай болса, деректеріңізді жылдам тасымалдау үшін ескі компьютеріңізді жаңа Mac Studio компьютеріңізге Ethernet немесе Thunderbolt кабелімен қосуыңызға да болады.
Time Machine функциясын файлдарды басқа Mac компьютерінен сақтау құрылғысына (сыртқы диск сияқты) сақтық көшірмелеу үшін пайдаланған болсаңыз, файлдарды құрылғыдан Mac Studio компьютеріне көшіруіңізге болады. Mac компьютеріңізді сақтық көшірмелеу және қалпына келтіру бөлімін қараңыз.
Файлдарды сақтау құрылғысынан көшіріңіз. Сақтау құрылғысын USB-A портына 
немесе Mac Studio компьютеріңіздегі Thunderbolt / USB 4 портына 
қосыңыз, одан кейін файлдарды сақтау құрылғысынан Mac Studio компьютеріңізге сүйреңіз.
Мазмұныңызды қалпына келтіріңіз. Mac компьютеріңізді Time Machine немесе басқа сақтық көшірмеден қалыпа келтіру жолы туралы мәліметтер алу үшін Mac компьютеріңізді сақтық көшірмеден қалпына келтіру атты Apple Support мақаласын қараңыз.
Қосымша мәліметтер. macOS жүйесінің пайдаланушы нұсқаулығындағы Ақпаратыңызды Mac компьютеріне басқа компьютерден немесе құрылғыдан тасымалдау бөлімін және Мазмұныңызды жаңа Mac компьютеріне көшіру атты Apple Support мақаласын қараңыз.