iPhone 11 және одан кейінгі модельдердің батареясы мен өнімділігі туралы

iPhone 11 және одан кейінгі модельдерде батареяның химиялық тозуына байланысты өнімділіктің төмендеу әсерін азайту үшін қолданылатын кіріктірілген бағдарламалық және аппараттық жүйе туралы біліңіз.

Батарея тозған сайынғы өнімділік туралы

iPhone құрылғыңызға кіріктірілген бағдарламалық және аппараттық жүйе автоматты түрде істейді, әрқашан қосулы болады әрі батарея уақыт өте келе тозған сайын мүмкіндігінше ең жоғары өнімділікті қамтамасыз етуге көмектеседі. iPhone құрылғыңыздағы қуат қажеттілігі үнемі динамикалық түрде бақыланады, ал жүйе осы қажеттіліктерге нақты уақыт режимінде жауап беру үшін өнімділікті басқарады. Бұл жүйе iPhone құрылғыңызға батареяның тозуынан туындайтын өнімділікке әсерді азайтуға мүмкіндік береді.

Жүйе өнімділікке әсерді мүмкіндігінше азайтқанымен, батареяның тозуы уақыт өте келе байқалатын, кейде уақытша болатын әсерлерге әкелуі мүмкін. Батареяның күйіне, заряд деңгейіне және iPhone құрылғыңыз орындап жатқан тапсырмаларға байланысты қолданбалардың ұзақ ашылуы немесе кадр жиілігінің төмендеуі сияқты әсерлер байқалуы мүмкін. Сондай-ақ өңдеу уақытының ұзаруы, сымсыз деректерді беру жылдамдығының төмендеуі, экран жарықтығының бәсеңдеуі немесе динамик дыбысының төмендеуі байқалуы мүмкін. Кейбір жағдайларда камера жарқылы немесе камераның басқа мүмкіндіктері уақытша қолжетімсіз болуы мүмкін.

iPhone 15 және одан кейінгі модельдердегі батарея туралы ақпаратты қараңыз

iOS 17.4 және одан кейінгі нұсқасы орнатылған iPhone 15 және одан кейінгі модельдерде батареяның күйі мен оның ең жоғары сыйымдылығын көре аласыз. Сондай-ақ батареяны ауыстыру қажеттілігін, зарядтау циклдерінің санын, батареяның өндірілген күнін және оның алғаш пайдаланылған уақытын көре аласыз:

1. «Реттеулер» қолданбасын ашыңыз, содан кейін «Аккумулятор» бөлімін түртіңіз.

2. Аккумулятор күйін түртіңіз.

iPhone 11, 12, 13 немесе 14 моделіндегі батареяның күйін тексеріңіз

Қайта қуатталатын барлық батарея — тұтынылатын бөлшектер. Сондықтан олардың қызмет ету мерзімі шектеулі: уақыт өте келе сыйымдылығы мен өнімділігі төмендеп, ауыстыруды қажет етеді. iPhone батареясының күйі және оны ауыстыру ұсынылатыны туралы қосымша ақпарат алу үшін:

1. «Реттеулер» қолданбасын ашыңыз, содан кейін «Аккумулятор» бөлімін түртіңіз.

2. «Батарея күйі және зарядтау» тармағын түртіңіз.

Толығырақ біліңіз

• Егер iPhone құрылғыңыздың өнімділігіне батареяның тозуы әсер етіп, батареяны ауыстыру бойынша көмек қажет болса, қызмет көрсету нұсқалары туралы ақпарат алу үшін Apple қолдау қызметіне хабарласыңыз.

• Мінсіз жағдайларда iPhone 14 және одан бұрынғы модельдердің батареялары 500 толық зарядтау циклінен кейін бастапқы сыйымдылығының 80 пайызын сақтауға есептеліп жасалған.* Мінсіз жағдайларда iPhone 15 және одан кейінгі модельдердің батареялары 1000 толық зарядтау циклінен кейін бастапқы сыйымдылығының 80 пайызын сақтауға есептеліп жасалған.* Барлық модельдерде батареяның нақты сыйымдылық пайызы құрылғының қалай пайдаланылатынына және зарядталатынына байланысты болады. Бір жылдық кепілдікке жергілікті тұтынушылар құқығы туралы заңдарда көзделген құқықтармен қоса, ақаулы батареяға қызмет көрсету де кіреді. Литий-ионды батареялардың зарядтау циклдері туралы толық ақпарат алыңыз.

• Батареялар — күрделі технология, ал олардың өнімділігіне бірқатар фактор әсер етеді. iPhone құрылғыңыздың батареясының ең жоғары сыйымдылығы және Apple батареяға қызмет көрсетуді қашан ұсынатыны туралы қосымша ақпарат алыңыз.

• Батареяның қызмет ету мерзімін қалай ұзартуға болатынын біліңіз.

• Егер iPhone құрылғыңыздың батареясы тым жылдам таусылып жатыр деп ойласаңыз, не істеу керегін біліңіз.

• Аккумуляторға қызмет көрсету және қайта өңдеу туралы біліңіз.

• iPhone құрылғыңыздың өнімділігін қалай жақсартуға болатыны туралы біліңіз.