iPhone, inngangur
Þessi handbók inniheldur tæknilegar leiðbeiningar um hvernig skuli skipta um upprunalega Apple-varahluti í iPhone og er ætluð tæknimönnum með þá þekkingu, reynslu og verkfæri sem þarf til að gera við rafeindatæki.
Mikilvægt
Lestu alla handbókina áður en lengra er haldið. Ef þú treystir þér ekki til að framkvæma viðgerðir samkvæmt leiðbeiningunum í þessari handbók, skaltu ekki halda áfram.
Notaðu alltaf nýjustu útgáfu þessarar handbókar sem til er á support.apple.com/en-us/docs/iphone.
Viðvörun
Ef viðgerðarleiðbeiningunum er ekki fylgt eða upprunalegir varahlutir frá Apple eða rétt verkfæri eru ekki notuð getur það valdið bruna eða öðrum öryggisvandamálum og leitt til meiðsla á fólki eða dauða.
Varúð
Ef viðgerðarleiðbeiningunum er ekki fylgt eða upprunalegir varahlutir frá Apple eða rétt verkfæri eru ekki notuð getur það skemmt iPhone, íhluti eða aðrar eignir, eða skaðað virkni tækisins eða vatnsheldni.
Upplýsingar um ábyrgð
Skemmdir sem hljótast af viðgerðum sem ekki eru framkvæmdar af Apple eða viðurkenndum þjónustuaðila Apple heyra ekki undir ábyrgð Apple eða AppleCare-tryggingar. Slíkar skemmdir geta valdið því að það þurfi að greiða fyrir viðgerðir og þær séu utan ábyrgðar eða orðið til þess að ekki verði hægt að gera við tækið hjá Apple eða viðurkenndum þjónustuaðilum Apple.
Verkfæri og varahlutir
Verkfæri
Verkfæri frá Apple eru hönnuð til að þola viðeigandi hita, afl og átak við viðgerðir og til að þola mikla notkun.
Upphitaði búnaðurinn til að fjarlægja skjá mýkir límið þannig að hægt sé að ná skjánum af hulstrinu. Búnaðurinn er notaður með upphituðum skjávasa sem er hannaður sérstaklega með stærðir tækisins í huga.
Skjápressan setur nægilegan þrýsting til að nýtt lím nái að taka sig við skjáísetningu. Skjápressan er notuð með viðgerðarbakka og skjálímpressuplötu sem eru sérstaklega hönnuð með stærðir tækisins í huga.
Rafhlöðupressan setur hæfilegan þrýsting til að nýtt lím nái að taka sig við ísetningu rafhlöðu. Rafhlöðupressan er notuð með viðgerðarbakka sem er hannaður með tilteknar stærðir tækisins í huga.
Pantanir á verkfærum og varahlutum
Hægt er að finna upplýsingar um það hvernig á að panta upprunalega varahluti og verkfæri frá Apple á support.apple.com/self-service-repair. Við kaup skal slá inn auðkenni handbókarinnar, sem finna má neðst á efnissíðunni, til að sýna að þú hafir lesið alla handbókina og staðfestir að þú hafir þekkingu og reynslu til að sinna fyrirhugaðri viðgerð.
Hugbúnaðarverkfæri
Viðgerðaraðstoðin er hugbúnaðarverkfæri sem lýkur við viðgerðina fyrir tiltekna nýja og notaða upprunalega Apple-varahluti. Hugsanlega verður mælt með viðgerðaraðstoð þegar viðgerðinni lýkur, en það fer eftir íhlutnum sem skipt er um hverju sinni.
Hvað felst í viðgerðaraðstoð? | Hvers vegna þetta er mikilvægt |
|---|---|
Flytur verksmiðjustillt kvörðunargildi | Ákveðnir varahlutir á borð við skjái, myndavélar og skynjara fyrir umhverfislýsingu hafa sín kvörðunargildi sem eru sérsniðin fyrir hvern einstakan varahlut við framleiðslu. Með því að sækja þessi gildi eru hámarksafköst og gæði tryggð eftir viðgerð. |
Tengir Secure Enclave við lífkennisannvottunarhluti | Eftir viðgerðir á móðurborði eða hlutum lífkennisannvottunar (Touch ID eða Face ID ) þarf að tengja lífkenniskynjara við Secure Enclave á móðurborðinu til að tryggja öryggi tækisins. |
Athuganir á virkjunarlás | Tilteknir íhlutir eru varðir með virkjunarlás. Viðgerðaraðstoð gengur úr skugga um að ekki sé kveikt á virkjunarlás fyrir íhlutinn sem verið er að setja í. |
Úthlutar þráðlausu svæði | Til að uppfylla reglur um samskipti verður að úthluta móðurborðinu þráðlausu svæði. |
Uppfærir fastbúnað | Ef fastbúnaður er uppfærður hefur tækið alla nýjustu öryggisvirkni og afköst. |
Hvernig hefja á viðgerðaraðstoð
Tryggið að eftirfarandi lágmarkskröfur séu uppfylltar:
Nýjasta útgáfan af iOS – ekki beta-útgáfa – á iPhone
Öflug Wi-Fi-tenging með 1,0 Mbps niðurhals- og upphleðsluhraða, með minna en 400 ms biðtíma og minna en 2% pakkatapi. Áætluð gagnanotkun við að keyra kerfisstillingu er 6–22 MB.
Ef viðgerðin er framkvæmd á tæki frá einhverjum öðrum skal setja tækið í greiningarstillingu og fylgja síðan leiðbeiningunum á skjánum.
Ef viðgerðin er framkvæmd á eigin tæki er hægt að kynna sér viðgerðaraðstoðina.
Viðvaranir
Ef viðvörunum er ekki sinnt getur það leitt af sér eldsvoða, meiðsl á fólki, gagnatap eða skemmdir á tækinu, varahlutum eða öðrum eignum.
 | Viðvörun | Leiðbeiningar til að draga úr hættu á líkamstjóni |
 | Varúð | Leiðbeiningar til að draga úr hættu á gagnatapi eða vélbúnaðarskemmdum |
Mikilvægt | Viðbótarupplýsingar til að framkvæma aðgerðir á árangursríkan hátt; hvorki viðvörun né varnaðarorð. |